Ilxom Matkarimov Qaraqalpaqstan Respublikası Ekonomika hám sanaat ministri etip tayınlandı

Búgin, 2019-jıl 20-iyun kúni Qaraqalpaqstan Respublikası Joqarǵı Keńesi Prezidumınıń 529-sanlı qararı menen Ilxom Ismailovich Matkarimov Qaraqalpaqstan Respublikası Ekonomika hám sanaat ministri etip tayınlandı. Ol, usı kúnge shekem 2019-jıldıń 13-may kúninen baslap O`zbekstan Respublikası Ekonomika hám sanaat ministrliginde Basqarma baslıǵınıń orınbasarı lawazımında islep kiyatırǵan edi.

Ilxom Matkarimov 1984-jıl Ámiwdárya rayonında tuwılǵan. 2010-jılı Qaraqalpaq Mámleketlik universitetin tamamlaǵan.

Xızmet iskerligi dawamında Ilxom Matkarimov, 2004-2010-jıllarda Ámiwdárya rayonı salıq inspektsiyasında hár qıylı lawazımlarda islep, 2010-2012-jıllarda Qaraqalpaqstan Respublikası Mámleketlik salıq basqarmasında Yuridikalıq shaxslardı salıqqa tartıw bo`limi baslıǵı, 2012-2014-jıllarda Beruniy rayonı salıq inspektsiyası baslıǵı, 2016-2018-jıllarda Beruniy rayonı hákiminiń Ekonomika hám isbilermenlik máseleleri boyınsha birinshi orınbasarı lawazımında, 2018-2019-jıllarda O`zbekstan Respublikası Bas prokuraturası Moynaq rayonın rawajlandırıwda nızamshılıqtıń orınlanıwı ústinen qadaǵalaw basqarması prokurorı lawazımında islegen.

2014-2016-jıllarda O`zbekstan Respublikası Prezidenti janındaǵı Mámleketlik basqarıwı akademiyası tıńlawshısı bolǵan.